6 СЕНТЯБРЯ 2021 В 08:33
Алай йисан 28-далай 31- августдалди Москвадин областдин Покровское хуьре тхэквондодай (япариз зайифдиз ван къвезвайбурун арада) Россиядин чемпионат кьиле фена. Дагъустандин спортсменри, вири санлай 13 (абурукай — 3 къизилдинбур) медаль къазанмишуналди, командайрин арада 1-чка кьуна. И еке агалкьуник чи лезги кьегьал хцин пайни ква. Вичин ери-бине Ахцегьай тир Замир Шихамадова (80 кг-дилай артух заланвал авайбурун арада) Россиядин чемпионвилин тIвар къазанмишна. Мубаракрай!
З.Шихамадов (шикилда: эрчIи патахъ галайди) спортдал аял чIавалай машгъул жезва. Агалкьунар чи ватандашдихъ идалай вилик йисарани хьана. ИкI, спортсменди жаванрин арада Россиядин кIвенкIвечивал патал акъажунра галаз-галаз 4 йисуз гъалибвал къазанмишна.
Гила ам кьвед лагьай сеферда уьлкведин виридалайни кьилин акъажунрин гъалибчи хьанва — 2020-йисуз Краснодарда кьиле фейи акъажунрани ада чемпионвилин тIвар къазанмишна. Мадни, алатай йисан мартдиз Карачаево-Черкесиядин меркез Черкесск шегьерда Россиядин тхэквондодин Союздин президентдин Кубок патал кьиле фейи акъажунра дагъустанвийрикай 9 спортсмен медалриз лайихлу хьанай. Абурун арада Замирни авай. Къуй чи ватандашдихъ дуьньядин спортдин кесерлу майданрани еке агалкьунар хьурай!
Рагнеда Рамалданова.
Лезги Газет