АЛЛАГЬ РИКIЕ АВАЙДА

Сад тир Аллагь – цаварал,чиларал

вири дуьнья вилив хуьз,
Гьарда вичин буржияр, дуьзвилел тухун патал.
И дуьньядин гьар са затI, ава ада гъилив хуьз,
Гьич саданни кефияр, чIур тахьун патал.

Аллагь рикIе авайда, ийич чIуру кIвалахар.
Ам гьамиша хийирдин рекье жеда, секин яз.
Гьар чкада туькIуьрда, ятар хъвазвай булахар,
Хатур ийиз виридаз, кьил хкажда, эркин яз.

Лугьуда хьи, садбурун, Аллагь ала цаварал,
Лугьуда хьи, садбурун, Аллагь ава рикIера.
Садбуруз адан патав, физ кIан жеда луварал,
Садбуру ялварзава, Сад Аллагьдин рекьера.

Аллагьдикай чуьнуьхай гьич са карни хьайид туш,
Гьар сада вуч ийизва, аквазва лап хъсандиз.
Сад Аллагьди таганмаз, са аялни хайид туш,
И кIвалахар чир хьана, кIанда гьар са инсандиз.

Аллагь рикIе авайда, писвал ийич садазни.
Хъсанвилихъ къалурда, амайбуруз чешне яз.
Вуна авур гьар са кар аквазвайди гьадазни,
Гьуьляйни кваз аквазва, дериндавай дегьне яз.

Гъавурда фад гьатдайдаз, бес я тIимил гафарни.
Сад Аллагьдин рекье вич инсанвилел тухуда.
Гъавурда гьат тийирдаз, кIелиз тежез гьарфарни,
Ван къвез, вичин япарни, биши хьанва лугьуда.

Аллагь рикIе авадаз, ислягьвал я кIаниди,
Са чIавузни садазни дяве кIандач чилерал.
Аллагь рикIе авай кас, гьелбетда я къениди,
Ахьтин ксар халкьари, хуьда, кьуна, гъилерал!

Добавить комментарий

Ваш адрес email не будет опубликован. Обязательные поля помечены *